नर्थ केरोलाइनामा समावेशी लोसार

अमेरिकाको नर्थ केरोलाइनामा बसोबास गर्ने हिमाली समुदायका नेपालीहरुले यो वर्षको ल्होसार कार्यक्रम सार्वजनिक गरेका छन । कार्यक्रम आयोजक समितीका सदस्य निमा पाखरिनका अनुसार लोसार मार्च 15 तारेख केरीको हिमालयन ग्रील एन्ड बारमा हुने तय भएको छ। लोसार कुनै जात जातिमा मात्र सिमित नराखी सबैको उपस्थिति रहोस भन्ने उद्देश्यले खुल्ला गरिएको आयोजक समितीले जनाएको छ। हिमाली समुदायका विभिन्न जातजाती र समूहले आयोजना गर्ने फरक फरक सोनाम ल्होसार, ग्याल्बो ल्होसार, तमु लोसार जस्ता पर्वलाई एकत्रित गरि सयुक्त ल्होसार मनाउन पहल गरिएको अर्का आयोजक सदस्य तेन्जिङ लामाले बताए। ल्होसार साँझमा विभिन्न जाती विशेष नाच र साँस्कृतिक कार्यक्रमका साथै विविधतापूर्ण नेपाली सँस्कृति झल्किने कार्यक्रमहरु पनि समेटिने छन। “सबै भाषा, धर्म र सँस्कारको सम्मान गर्ने र चाडबाड साझा रुपमा मनाउने नेपालीको बिशेषता हो ।” आयोजक समिताका अर्का सदस्य जीतमान बस्नेतले बताए। रियलस्टेट ब्यबसायी बस्नेत विभिन्न जातजातीको प्रतिनिधित्व हुने गरि ल्होसार मनाउनु पर्छ भन्ने भावनाले विगत ५ वर्ष देखि ल्होसारको आयोजनामा सक्रिय भूमिका खेल्दै आएका छन् ।