चिन्तन, चेतना र चिरस्थायी सत्यको खोजीमा – भूषिता वशिष्ठ संग संवाद

यस नेपाल टक्सको विशेष एपिसोडमा हामीले लिएर आएका छौं एक अत्यन्तै गहन, सौम्य र चेतनाले भरिएको संवाद – भूषिता वशिष्ठ सँग। साहित्यकार, कवि वशिष्ठ एक Fulbright Scholar, Reed जस्तो Pushcart-award जितेको म्यागजिनकी Fiction Editor तथा Copy Editing Chief  रहिसक्नुभएको छ । हाल धरान बस्नुहुने वशिष्ठ साहित्य, आध्यात्म, दर्शन र जीवनका गहिरा पक्षहरूमाथि आधारित आफ्ना विचारहरुले सामाजिक संजाल र संचार माध्यमहरुमा परिचित हुनुहुन्छ ।

अमेरिकाबाट नेपाल टक्सका होस्ट अनन्त नेपाल र धरानबाट भूषिता वशिष्ठको यो पडकास्ट रिमोट रेकर्डिगं गरिएको हो ।

गणेश र सरस्वती वन्दना बाट कुराकानीको सुरु हुन्छ , जसले पूर्वीय साहित्यको भाकापन, अनुप्रास, यमक अलङ्कार जस्ता गहिरा पक्षहरूलाई उजागर गर्छ। उहाँका शब्दहरूमा पूर्वीय साहित्य एउटा सौन्दर्य र चिन्तनको संसार हो, जसको जरा गहिरो अनुभूति र लयमा समाहित छ ।

“सुरु राम्रो गर्ने कि अन्त्य राम्रो गर्ने?” भन्ने प्रश्नमा उहाँको उत्तर सरल छ – “प्रकृतिको बगाइसँगै बग्न सिक्नुपर्छ।” उहाँको विचारमा सफलताको प्रमुख आधार हो सकारात्मक मनस्थिति, शुद्ध नियत र प्राकृतिक लयसँग तालमेल ।

भूषिता वशिष्ठ सत्यको अवधारणा निकै फरक ढंगले व्याख्या गर्नुहुन्छ। उहाँ भन्नुहुन्छ, “सत्य सापेक्ष हुन्छ, तपाईंको सत्य मेरो सत्य नहुन सक्छ ।” संसारमा मात्र ज्ञात र अज्ञात होइन, अज्ञेय (Unknowable) पनि छ जुन हाम्रो वरिपरि त छ तर हाम्रो चेतनाले बुझ्न वा ठम्याउन र पहिचान गर्न सक्दैन ।

उहाँले holographic universe र हाम्रो सपनाको संसारसँग वास्तविकताबीचको फरकबारे पनि चर्चा गर्नुभएको छ ।  निद्राको समयमा हाम्रो अनुभूति फरक हुन्छ भने बिउँझिएको बेला अर्कै, त्यसैले वास्तविकता पनि एउटा मानसिक संरचना हो, स्थायी होइन।

उहाँ तत्काल लाभ (instant gratification) खोज्ने प्रवृत्ति प्रति सचेत गराउन चाहनुहुन्छ ।  उहाँका भनाइमा हाम्रो निष्ठा सत्यप्रति हुनु पर्छ, न कि ताली र वाहवाहीप्रति। व्यक्ति र समाजले आत्मकेन्द्रित सोचभन्दा माथि उठेर, दया, शान्ति र सह-अस्तित्वतर्फ ध्यान दिनु आजको आवश्यकता हो।